አውቶቡስ ውስጥ በአንዲት ወጣት ላይ የብልግና ድርጊት የፈጸመ ግለሰብ ተቀጣ

(Nov 21, 2012, Reporter)--ከፈረንሳይ ለጋሲዮን ጉራራ አካባቢ ተነስቶ ወደ መርካቶ በሚያመራው 12 ቁጥር አውቶቡስ የተሳፈረ ግለሰብ፣ በአንዲት ወጣት ላይ የመድፈር ተግባር በመፈጸሙ በፅኑ እስራት እንዲቀጣ ተወሰነበት፡፡ ኅዳር 7 ቀን 2005 ዓ.ም. ውሳኔውን ያስተላለፈው የፌዴራል የመጀመሪያ ደረጃ ፍርድ ቤት መናገሻ ምድብ ችሎት ነው ድርጊቱን መፈጸሙ በሰው ምስክሮችና በሰነድ በመረጋገጡ ግለሰቡ በአንድ ዓመት ከአሥር ወር ፅኑ እስራት ቅጣት ተጥሎበታል፡፡

ግለሰቡ ድርጊቱን ፈጸመ የተባለው በጉለሌ ክፍለ ከተማ ቀበሌ 01/02 ክልል፣ ልዩ ቦታው አዲስ አበባ ዩኒቨርሲቲ አምስተኛ በር ተብሎ በሚጠራው አካባቢ ነው፡፡ አውቶቡሱ ከፈረንሳይ ወደ ጊዮርጊስ አቅጣጫ በመጓዝ ላይ እያለ፣ አየለ መዓዛ ወልደ ዮሐንስ የተባለው ተሳፋሪ የግል ተበዳይዋን ከኋላዋ በመተሻሸት ኃፍረተ ሥጋውን በማውጣት፣ የለበሰችውን ቀሚስ ወደ ላይ ከፍ አድርጎ የዘር ፈሳሽ በልብሷ ላይ ማፍሰሱን የዓቃቤ ሕግ ክስ ያስረዳል፡፡ ለመልካም ሥነ ምግባር ተቃራኒ የሆነ ብልግናና አሳፋሪ ሥራን በአደባባይ በመፈጸም ወንጀል መከሰሱንም ገልጿል፡፡

ግለሰቡ ድርጊቱን ሲፈጽም የተመለከቱ አዛውንት ድርጊቱን በመኮነን ‹‹እንዴት እንደዚህ ያለ አፀያፊና ወራዳ ተግባር ትፈጽማለህ?›› ሲሉት፣ በያዘው የመስታወት መቁረጫ ስለት እጃቸውን ሁለት ቦታ እንደወጋቸውና እግራቸውንም እንደነከሳቸው ክሱ ያስረዳል፡፡

የዓቃቤ ሕግን ክስ የመረመረው ፍርድ ቤቱ ድርጊቱ በሰውና በሰነድ ማስረጃ መረጋገጡን ገልጾ፣ የወንጀሉ መጠን በከባድ የወንጀል ደረጃ መድቦታል፡፡ በመሆኑም የተጠቀሰበት የወንጀል ሕግ አንቀጽ የሚያስቀምጠውን ከፍተኛውን የቅጣት መነሻ ይዞ በሁለቱም ድርጊት በድምሩ አንድ ዓመት ከአሥር ወር እንዲታሰር ወስኖበታል፡፡
Source: Reporter

Related topic: 
ልጁን አስገድዶ ለሦስት ዓመታት የደፈረው አባት በፅኑ እስራት ተቀጣ

Home